શ્રોત: ગ્રામિણ ટુડે ન્યુઝ ૨૪x૭ વેબ પોર્ટલ
સાપુતારા ઘાટ માર્ગે ત્રાટક્યું સંકટ, BSF ની ટ્રક પલટતાં ૯ જવાનો ઇજાગ્રસ્ત :
પ્રદિપ ગાંગુર્ડે, ડાંગ : ડાંગ જિલ્લાના જીવલેણ વળાંકોથી ઓળખાતા સાપુતારા–શામગહાન રાષ્ટ્રીય ધોરીમાર્ગ પર ગતરોજ એક ભયાવહ માર્ગ અકસ્માતે સમગ્ર વિસ્તારને ધ્રુજાવી દીધો હતો. મહારાષ્ટ્રના નાશિકથી રાજસ્થાનના જોધપુર તરફ આગળ વધી રહેલા ભારતીય સૈન્યના કાફલા દરમિયાન સાપુતારા ઘાટ ઉતરતી વેળાએ એક BSF ટ્રક અચાનક કાબૂ બહાર જઈ રસ્તા પર ઉલટી પડી હતી.
મળતી માહિતી મુજબ, ઘાટના અતિ તીખા અને જોખમી વળાંક પર ટ્રકના ચાલકે સ્ટીયરિંગ પરથી કાબૂ ગુમાવતા સંરક્ષણ વ્યવસ્થાની રીઢ ગણાતી તોપ લાદેલી સૈન્ય ગાડી પળોમાં ઉથલપાથલ થઈ ગઈ હતી. અકસ્માતની તીવ્રતા એટલી ભયંકર હતી કે ટ્રકમાં સવાર કુલ ૧૩ જવાનોમાંથી ૯ જવાનો ગંભીર રીતે ઝપટાયા હતા અને તેમને નાની-મોટી ઈજાઓ પહોંચી હતી. જોકે, સદનસીબે આ ગંભીર ઘટનામાં કોઈ જાનહાનિ થઈ નથી.
અકસ્માતની જાણ થતાં જ ઘાટ વિસ્તાર જાણે એલર્ટ પર આવી ગયો હતો. સ્થાનિક રહેવાસીઓ, રાહદારીઓ અને ડાંગ જિલ્લા પોલીસનો દળ તાત્કાલિક ઘટનાસ્થળે દોડી આવ્યો હતો. ઘાયલ થયેલા નવેય જવાનોને ૧૦૮ એમ્બ્યુલન્સ દ્વારા નજીકના શામગહાન સામુહિક આરોગ્ય કેન્દ્ર ખાતે લઈ જઈ તાત્કાલિક પ્રાથમિક સારવાર આપવામાં આવી હતી. જોકે, ઈજાગ્રસ્તોમાંથી ત્રણ જવાનોની સ્થિતિ ચિંતાજનક જણાતા, તબીબોની સલાહ મુજબ તમામ નવ જવાનોને વધુ અદ્યતન અને સઘન સારવાર માટે આહવા સિવિલ હોસ્પિટલ ખાતે ખસેડવામાં આવ્યા છે. હાલ હોસ્પિટલમાં તબીબોની વિશેષ ટીમ દ્વારા જવાનોની સારવાર સતત ચાલી રહી છે.
આ અકસ્માતના પગલે સાપુતારા–શામગહાન ઘાટ માર્ગ પર વાહનવ્યવહાર સંપૂર્ણપણે ઠપ્પ થઈ ગયો હતો. પ્રવાસી વાહનો અને માલવાહક ટ્રકોની લાંબી કતારો લાગી જતા માર્ગ પર ટ્રાફિક જામનો અતિ ગંભીર માહોલ સર્જાયો હતો. પરિસ્થિતિને સંભાળવા માટે સાપુતારા પોલીસ સ્ટેશનના PI પી.ડી. ગોંડલિયાની આગેવાની હેઠળ પોલીસ ટીમે મોરચો સંભાળ્યો હતો અને કલાકોની ભારે જહેમત બાદ માર્ગ પર વાહનવ્યવહાર પુનઃ શરૂ કરાયો હતો.
ઉલ્લેખનીય છે કે, અકસ્માતગ્રસ્ત સૈન્ય વાહનમાં ઉચ્ચ સ્તરના સુરક્ષા પ્રોટોકોલ ધરાવતું સંવેદનશીલ સંરક્ષણ સાધન (તોપ) હોવાના કારણે ઘટનાસ્થળે સુરક્ષાનો કડક બંદોબસ્ત ગોઠવવામાં આવ્યો હતો. કોઈપણ પ્રકારની અનિચ્છનીય ઘટના ન બને તે માટે પોલીસ તેમજ સૈન્યના ઉચ્ચ અધિકારીઓ દ્વારા સમગ્ર વિસ્તાર પર ચાંપતી નજર રાખવામાં આવી રહી છે.
