શ્રોત: ગ્રામિણ ટુડે ન્યુઝ ૨૪x૭ વેબ પોર્ટલ
ઉનાઈ ખાતે ભક્તિ અને લોકસંસ્કૃતિનો દિવ્ય મહાસંગમ, ઉનાઈ ઉત્સવ–૨૦૨૬ની ભવ્ય ઉજવણી:
કમલેશ ગાંવિત, ઉનાઈ : નવસારી જિલ્લાના પવિત્ર યાત્રાધામ ઉનાઈ માતાજી મંદિર ખાતે તા. ૨૨ અને ૨૩ ફેબ્રુઆરી, ૨૦૨૬ દરમિયાન “ઉનાઈ ઉત્સવ ૨૦૨૫-૨૬”નું ભવ્ય અને અલૌકિક આયોજન ભક્તિભાવ, લોકપરંપરા અને આધુનિક સાંસ્કૃતિક અભિવ્યક્તિના અદ્વિતીય સમન્વય સાથે યોજાયું હતું. રાજ્ય સરકારના રમતગમત, યુવા અને સાંસ્કૃતિક પ્રવૃત્તિઓ વિભાગ હેઠળ કમિશનરશ્રી યુવક સેવા અને સાંસ્કૃતિક પ્રવૃત્તિઓની કચેરી, ગાંધીનગર તથા જિલ્લા વહીવટી તંત્ર નવસારીના સંયુક્ત પ્રયત્નોથી સમગ્ર યાત્રાધામ પરિસર આ બે દિવસ માટે ભક્તિમય ઉર્જાથી ધબકતું બન્યું હતું.
ઉત્સવના પ્રથમ દિવસે માતાજીના પાટોત્સવ નિમિત્તે ભવ્ય શોભાયાત્રા યોજાઈ, જેમાં નાસિક ઢોલના ગર્જતા નાદ, શંખધ્વનિ અને જયઘોષ વચ્ચે ભક્તોએ આધ્યાત્મિક આનંદનો અનુભવ કર્યો. મણિયારો રાસ, ડાંગી નૃત્ય, ઘેરીયા, કાહળી, તારપા અને માદળ ઢોડીયા જેવી આદિવાસી અને લોકપરંપરાગત નૃત્યશૈલીઓએ ઉપસ્થિત જનસમૂહને મંત્રમુગ્ધ કરી દીધો. અંદાજે ૨૫૦થી વધુ લોકકલાકારોએ રંગબેરંગી પરંપરાગત વેશભૂષામાં પ્રસ્તુત કરેલી ઝાંખીઓએ ઉનાઈની ધરતીને જીવંત લોકવારસાની ગૌરવગાથાથી રંજિત કરી દીધી.
સાંજે યોજાયેલા મુખ્ય સાંસ્કૃતિક કાર્યક્રમનો શુભારંભ રાજ્યના આદિજાતિ વિકાસ, ખાદી, કુટીર અને ગ્રામોદ્યોગ વિભાગના કેબિનેટ મંત્રી નરેશભાઈ પટેલના હસ્તે કરવામાં આવ્યો હતો. મંત્રીશ્રીએ પોતાના ઉદ્દબોધનમાં ઉનાઈ માતાજી મંદિરની ઐતિહાસિક પરંપરા અને આધ્યાત્મિક મહત્તાને ઉજાગર કરતાં જણાવ્યું કે આવા ઉત્સવો માત્ર મનોરંજન પૂરતા મર્યાદિત નથી, પરંતુ સંસ્કૃતિના સંવર્ધન અને યુવા પેઢીમાં પરંપરાગત મૂલ્યોના સંચાર માટે સશક્ત માધ્યમ છે. રાજ્ય સરકાર યાત્રાધામોના સર્વાંગી વિકાસ અને સાંસ્કૃતિક ધરોહરની જાળવણી માટે પ્રતિબદ્ધ હોવાનું તેમણે ઉમેર્યું.
પ્રથમ દિવસની સાંજ ગુજરાત ગૌરવ પુરસ્કૃત લોકકલાકાર ભરત બારીયા અને અક્ષય બારીયાની ભક્તિમય પ્રસ્તુતિઓથી ઉજળી બની. આરતી, ડાકલા અને રામાયણ નૃત્ય દ્વારા તેમણે ભક્તિનો ગાઢ રંગ છાંટ્યો. ત્યારબાદ સુપ્રસિદ્ધ ગાયક ઓસમાણ મીર અને આમીર મીરના સુરીલા સ્વરોમાં ગુંજેલા લોકડાયરાએ સમગ્ર રાત્રિને સંગીતમય બનાવી દીધી. ભક્તિગીતો, સંતવાણી અને લોકગીતોની મધુર ધૂનોએ શ્રોતાઓને ભાવવિભોર કરી દીધા.
ઉત્સવના બીજા દિવસે રાસ-ગરબાની રંગત અને યુવાનીનો ઉમંગ જોવા મળ્યો. લોકપ્રિય કલાકાર રાજ ગઢવી (નડીયાદ રાજ) અને અલ્પા પટેલના તાલ-સુરે સમગ્ર પરિસર ધબકતું બની ગયું. યુવાઓથી લઈને વડીલો સુધી સૌએ ઉત્સાહપૂર્વક રાસ-ગરબામાં ભાગ લઈ ઉત્સવને લોકઉલ્લાસનો શિખર આપ્યો. દુર્ગા સ્તુતિ, તલવાર રાસ, ફ્યુઝન ડાન્સ તથા ડાક-ડમરૂની આધ્યાત્મિક પ્રસ્તુતિઓએ કાર્યક્રમને ભક્તિ અને શક્તિના અનોખા આયામે પહોંચાડ્યો.
ઉનાઈ તથા નવસારી જિલ્લાની ઉત્સવપ્રિય જનતાએ વિશાળ સંખ્યામાં હાજરી આપી આ મહોત્સવને સફળ બનાવ્યો. ભક્તિ, પરંપરા અને આધુનિક કળાના સુમેળરૂપ “ઉનાઈ ઉત્સવ”એ માત્ર બે દિવસનો કાર્યક્રમ નહીં, પરંતુ સાંસ્કૃતિક ગૌરવ અને સામૂહિક એકતાનો જીવંત ઉત્સવ બની સૌના હૃદયમાં અવિસ્મરણીય છાપ છોડી.
આ રીતે ઉનાઈની પવિત્ર ધરતી પર ઉજવાયેલો આ મહાસંગમ સંસ્કૃતિની સુગંધ, શ્રદ્ધાની શક્તિ અને લોકકલાના ગૌરવનો અનોખો પ્રતીક બની સફળતાપૂર્વક સમાપન પામ્યો.
