શ્રોત: ગ્રામિણ ટુડે ન્યુઝ, ૨૪x૭ વેબ પોર્ટલ
ખાટાંઆંબા બેઠકમાં ધવલભાઈ પટેલનો દાવો: 600 કરોડના વિકાસથી વાંસદામા આવ્યો બદલાવ
ચૂંટણી પૂર્વે વાંસદામાં ભાજપ સક્રિય: બહુમતીથી જીતાડવા કાર્યકરોને હાકલ
કમલેશ ગાંવિત, વાંસદા: વાંસદા તાલુકાના ખાટાંઆંબા જિલ્લા પંચાયત સીટ નંબર-11 માટે યોજાયેલ મહત્વપૂર્ણ બેઠક રાજકીય દૃષ્ટિએ ઉત્સાહભર્યા માહોલમાં સંપન્ન થઈ હતી. માનનીય સાંસદ ધવલભાઈ પટેલની આગેવાની હેઠળ યોજાયેલી આ બેઠકમાં સ્થાનિક સ્વરાજની આવનારી ચૂંટણીને ધ્યાનમાં રાખીને ભાજપના ઉમેદવારો, કાર્યકરો અને મોટી સંખ્યામાં મતદારો ઉત્સાહપૂર્વક જોડાયા હતા.
કાર્યક્રમની શરૂઆત પરંપરાગત રીતે દીપ પ્રાગટ્ય સાથે કરવામાં આવી હતી, જેના દ્વારા સકારાત્મક અને વિકાસમુખી વાતાવરણનું નિર્માણ થયું હતું. ભાજપ પ્રમુખ સંજયભાઈએ મહેમાનોનું હાર્દિક શબ્દોમાં સ્વાગત કર્યું હતું અને પુષ્પગુચ્છ અર્પણ કરી સન્માનિત કર્યા હતા. કાર્યક્રમમાં જિલ્લા પંચાયતના ઉમેદવાર તરુણભાઈ ગાંવિત તેમજ તાલુકા પંચાયતના ઉમેદવારો ઉમાબેન (બોરીઆછ), શિવાજભાઈ (મનપુર), બિપીનભાઈ (ખાટાંઆંબા) અને સીતાબેન (ચૌંઢા) ઉપસ્થિત રહ્યા હતા. ઉપરાંત મંત્રીશ્રી પિયુષભાઈ, નવસારી જિલ્લા મંત્રી લોચનભાઈ શાસ્ત્રી, સરપંચશ્રીઓ, તમામ સીટોના મતદારો અને ભાજપના સમર્પિત કાર્યકરોની નોંધપાત્ર હાજરી રહી હતી.
આદિજાતી પ્રદેશ મોરચાના મહામંત્રી પિયુષભાઈએ પોતાના ઉદ્દબોધનમાં વિકાસના વિવિધ પરિમાણોને સ્પર્શતા માર્ગદર્શન આપ્યું હતું. તેમણે જિલ્લા પંચાયતના સભ્ય ચંદુભાઈના સફળ કાર્યકાળના ઉદાહરણો રજૂ કરીને વિકાસ કેવી રીતે લોકોના જીવનમાં પરિવર્તન લાવી શકે તે સ્પષ્ટ રીતે સમજાવ્યું હતું, જેના કારણે ઉપસ્થિતોમાં વિશ્વાસ અને ઉત્સાહનો માહોલ સર્જાયો હતો.
બેઠકના મુખ્ય વક્તા તરીકે સંબોધન કરતાં સાંસદ ધવલભાઈ પટેલે જણાવ્યું હતું કે છેલ્લા બે વર્ષ દરમિયાન રાજ્ય સરકાર અને કેન્દ્ર સરકારના સંકલિત પ્રયાસોથી વાંસદા તાલુકામાં 600 કરોડ રૂપિયાથી વધુના વિકાસકાર્યોને ગતિ આપવામાં આવી છે. તેમણે વડાપ્રધાન નરેન્દ્રભાઈ મોદીના દુરંદેશી નેતૃત્વ માટે આભાર વ્યક્ત કર્યો હતો અને કહ્યું હતું કે જનતાના વિશ્વાસ અને પ્રેમના કારણે તેમને કેન્દ્ર સ્તરે મહત્વપૂર્ણ જવાબદારીઓ સોંપવામાં આવી છે.
તેમણે વધુમાં ભારપૂર્વક જણાવ્યું કે વાંસદા વિસ્તારમાં ઝડપી અને સર્વાંગી વિકાસ માટે ઉપરના સ્તરે મજબૂત રજુઆતો અને પ્રભાવશાળી પ્રતિનિધિત્વ અનિવાર્ય છે. જિલ્લા પંચાયત તથા તાલુકા પંચાયતના સભ્યોની સક્રિય ભૂમિકા વિના વિકાસના લક્ષ્યો હાંસલ કરવી મુશ્કેલ હોવાનું તેમણે સ્પષ્ટ કર્યું હતું. મતદારોને સંબોધતા તેમણે અપીલ કરી કે તેઓ પોતાનો મત વિચારીને ઉપયોગ કરે અને વિકાસમુખી ભાજપના ઉમેદવારોને બહુમતીથી વિજયી બનાવે.
અંતમાં તેમણે ઉલ્લેખ કર્યો કે નવસારી જિલ્લામાં ભાજપના 41 ઉમેદવારો બિનહરીફ ચૂંટાઈ આવ્યા છે, જે પક્ષની લોકપ્રિયતા અને જનસમર્થનનો સ્પષ્ટ પુરાવો છે. આદિવાસી વિસ્તારોના સર્વાંગી વિકાસ માટે તેઓ હંમેશા પ્રતિબદ્ધ રહેશે તેવું વિશ્વાસ અપાવતા તેમણે કેનાલ મારફતે પાણીની સમસ્યાનો સ્થાયી ઉકેલ લાવવા માટે ઉચ્ચ સ્તરે સતત પ્રયત્નો કરવાની ખાતરી આપી હતી.
બેઠકનો સમાપન વિકાસના દૃઢ સંકલ્પ અને ચૂંટણીમાં ભવ્ય વિજયના લક્ષ્ય સાથે કરવામાં આવ્યો હતો, જેમાં કાર્યકરોને એકજુટ રહી મહેનત કરવાની અને ભાજપના ઉમેદવારોને બહુમતીથી જીતાડવાની હાકલ કરવામાં આવી હતી.
