શ્રોત: ગ્રામિણ ટુડે ન્યુઝ, તાપી કીર્તનકુમાર
ગ્રામ પંચાયત સામાન્ય ચૂંટણી -૨૦૨૧ અન્યવે મતદાનના દિવસે વાહનોના ઉપયોગ ઉપર પ્રતિબંધ ફરમાવતું જાહેરનામું:
વ્યારા, તાપી: રાજયની અંદાજિત ૧૦૮૭૯ ઉપરાંતની ગ્રામ પંચાયતોની સામાન્ય/વિભાજન/મધ્યમસત્ર/પેટા પ્રસંગોપાત ખાલી પડેલ બેઠકો માટે ચૂંટણી યોજવાની જાહેરાત તા.૨૨-૧૧-૨૦૨૧ના રોજ કરવામાં આવી છે. જે અન્વ્યે તાપી જિલ્લામાં ગ્રામ પંચાયતોની સામાન્ય/વિભાજન/મધ્યસત્ર/પેટા ચૂંટણી દરમિયાન સમગ્ર જિલ્લામાં કાયદો અને વ્યવસ્થાની પરિસ્થિતિ જળવાઇ તથા મુકત અને ન્યાયી ચૂંટણી યોજી શકાય એ માટે તાપી અધિક જિલ્લા મેજીસ્ટ્રેટ આર.જે.વલવીએ એક જાહેરનામું બહાર પાડીને શાસક પક્ષ, રાજકિય પક્ષો કે ઉમેદવારો માટે કેટલાક કૃત્યોા ઉપર પ્રતિબંધ ફરમાવેલ છે.
જે મુજબ જિલ્લામાં મતદાનના દિવસે પોતાના ઉપયોગ માટે એક વાહન તથા મતદાર વિભાગમાં મતદાનની તારીખે ચુંટણી એજન્ટ અથવા તેના કાર્યકરો, પક્ષીય કાર્યકરો માટે ચુંટણી અધિકારી દ્વારા મળેલ પરમીટવાળા એક જ વાહનનો ઉપયોગ કરી શકાશે. જેના ઉપર પરમીટ નંબર પ્રદર્શિત કરવું આવશ્યક રહેશે. ઉમેદવાર, મતદાન એજન્ટ, પક્ષીય કાર્યકરો આ પરમીટ ધારણ કરેલ વાહનોનો ઉપયોગ ચુંટણી કાર્યના સમય દરમિયાન મતદારોને લાવવા લઈ જવા, અસામાજિક તત્વોની હેરફેર કે ગેરકાયદેસર હથિયારોની હેરફેર માટે કરી શકશે નહીં.
કોઇપણ વ્યક્તિ પોતાના કોઇ પણ પ્રકારના વાહનોમાં મતદારોની હેરાફેરી કે તેવા હેતુસર વાહનનો ઉપયોગ કરી શકશે નહી. કોઈપણ વ્યક્તિ વાહનનો ઉપયોગ પોતાના અને કુટુંબની વ્યક્તિઓ પુરતો મર્યાદિત ઉપયોગ કરી શકશે. કોઈ પણ રાજકીય/બિન રાજકીય પક્ષો કે તેમના ઉમેદવારો અગર અપક્ષ ઉમેદવારો કે તેઓના ચુંટણી એજન્ટ દ્વારા અથવા તેમની સહમતીથી બીજી કોઈ પણ વ્યક્તિ દ્વારા મતદાનના દિવસે મતદારોને મતદાન મથક સુધી લાવવા-લઈ જવાની મફત સગવડ માટે વાહનો ભાડે રાખવા કે મેળવવા અથવા આ રીતે વાહનોનો ઉપયોગ કરવા ઉપર પ્રતિબંધ ફરમાવવામાં આવેલ છે. આ પ્રતિબંધ સરકારી અધિકારી કે ચુંટણી સાથે સંકળાયેલા અધિકારીઓને લાગુ પડશે નહી. આ જાહેરનામું તા.૨૪-૧૨-૨૦૨૧ સુધી અમલમાં રહેશે. આ હુકમનો ભંગ કરનાર શિક્ષાને પાત્ર થશે.
