શ્રોત: ગ્રામીણ ટુડે ન્યુઝ 24×7 વેબ પોર્ટલ, પત્રકાર: દિનકર બંગાળ
ડાંગના વઘઈ ખાતે એજ્યુકેશન ઇનોવેશન ફેસ્ટિવલ યોજાયો:
વઘઈ: ગુજરાત શૈક્ષણિક સંશોધન અને તાલીમ પરિષદ ગાંધીનગર પ્રેરિત જિલ્લા શિક્ષણ અને તાલીમ ભવન, વઘઈ ખાતે વિધાનસભાના નાયબ દંડક વિજયભાઈ પટેલ તેમજ ડાંગ જિલ્લા પંચાયત પ્રમુખ શ્રીમતી નિર્મળાબેન ગાઈનની અધ્યક્ષતામાં નવમો એજ્યુકેશન ઈનોવેશન યોજવામાં આવ્યો હતો.
વિજયભાઈ પટેલ આ પ્રસંગે જણાવ્યું હતું કે, ભવિષ્ય નિર્માણની જવાબદારી નિભાવનારા શિક્ષકો દ્વારા વિદ્યાર્થીઓમાં વાંચન, લેખન અને ગણન પ્રક્રિયા સરળ બનાવવા માટે નવતર પ્રયોગો કરી, ડાંગ જિલ્લાની શિક્ષણની ગુણવત્તામાં વધારો કરાયો છે. આજે ડાંગ જિલ્લાના છેવાડાની શાળા સુધી શિક્ષણ ઉજાસ પથરાયો છે. તેમણે શિક્ષકો દ્વારા નવતર પ્રયોગો દ્વારા અનુભવજન્ય શિક્ષણની સરાહના કરી હતી. શિક્ષણ જગતમાં નવતર પ્રયોગો થકી ગુણવત્તાયુક્ત શિક્ષણ આપવા બદલ ડાંગ જિલ્લા પ્રમુખ શ્રીમતી નિર્મળાબેન ગાઈન,તેમજ વઘઈ તાલુકા પંચાયતના પ્રમુખ ચંદરભાઈ ગાવિતે શિક્ષકોને અભિનંદન પાઠવ્યા હતા.
શિક્ષકો દ્વારા નવતર પ્રયોગો થકી જ શાળાઓની ગુણવત્તામાં વધારો થઈ શકે છે, તેમ જી.સી.આર.ટી.સી. ગાંધીનગરના સંજયભાઈ ત્રિવેદી જણાવ્યું હતુ. વઘઈ ડાયટ પ્રાચાયી ડો.બી.એમ. રાઉતે કાર્યક્રમની રૂપરેખા આપી જણાવ્યું હતુ કે, ટેકનોલોજીના યુગમાં શિક્ષણમાં આમુલ પરિવર્તન જોવા મળે છે. હાલમાં શાળાના શિક્ષકો દ્વારા અનેક પદ્ધતિઓ પ્રયુકિતનો શિક્ષણમાં ઉપયોગ કરી નવતર પ્રવૃત્તિઓ કરવામાં આવી રહી છે. વઘઈ ખાતે યોજાયેલ નવમા એજ્યુકેશન ઇનોવેશન ફેસ્ટિવલમાં ડાંગ જિલ્લાના વિવિધ શાળાના શિક્ષકો દ્વારા નવતર પ્રવૃત્તિઓની કૃતિઓ રજૂ કરવામા આવી હતી.
