શ્રોત: ગ્રામીણ ટુડે ન્યુઝ, ૨૪x૭ વેબ પોર્ટલ
પહાડોની વચ્ચે પ્રગટ્યો કરુણાનો દીપ: ચિખલી પ્રેરણા ગ્રુપનો અનોખો ઉપક્રમ
૯૦થી વધુ જરુરીયાતમંદ પરિવારોને જીવનઆધાર કીટ અર્પણ :
પ્રદિપ ગાંગુર્ડે, ડાંગ : અરણ્ય અને અઘોર પહાડોથી ઘેરાયેલા ડાંગ જિલ્લાના અંતરિયાળ વિસ્તારોમાં માનવતાનો એક પ્રચંડ મહાગર્જન સંભળાયો, જ્યારે ચિખલી પ્રેરણા ગ્રુપ અને સહ્યાદ્રી ડાંગ માઉન્ટેનિયરિંગ એન્ડ એડવેન્ચર એસોસિએશન, ચિરાપાડાના સંયુક્ત સંકલ્પથી વિશાળ અનાજ કીટ વિતરણ અભિયાનનું આયોજન કરવામાં આવ્યું. આ અભિયાન માત્ર સહાય નહીં, પરંતુ સંવેદનાનો શક્તિશાળી સંદેશ બની ઊભર્યું. નવ ગામોના ૯૦થી વધુ નિરાધાર, વૃદ્ધ, અપંગ અને વિધવા નાગરિકોને જીવનરક્ષક સામગ્રીથી ભરપૂર કીટ અર્પણ કરવામાં આવી.
શામગહાન, ભુરાપાણી, ભાપખલ, રાનપાડા, બારીપાડા, ચિરાપાડા, મહારાઈચોંડ, બોરીગાંવઠા અને ચિખલી જેવા દુર્ગમ અને અપ્રવેશ્ય વિસ્તારો સુધી પહોંચવું એ પોતે જ એક સાહસિક મિશન સમાન હતું. પહાડોની કઠોર પરિસ્થિતિ અને અપર્યાપ્ત સુવિધાઓ વચ્ચે સ્વયંસેવકોએ અડગ મનોબળ, અવિચળ નિષ્ઠા અને જ્વલંત સેવાભાવથી આ અભિયાન પાર પાડ્યું. એક મહિના સુધી જીવનધારા ચાલુ રાખે તેવી અનાજ કીટમાં દાળ, ચોખા, લોટ, તેલ અને બિસ્કિટ જેવી આવશ્યક ચીજવસ્તુઓનો સમાવેશ કરાયો હતો.
ચિરાપાડા પ્રાથમિક શાળાના પરિસરમાં આયોજિત કાર્યક્રમમાં અનેક પ્રતિષ્ઠિત મહાનુભાવો ઉપસ્થિત રહ્યા હતા. ચિખલી રિધમ ફાર્મ સાથે સંકળાયેલા તથા ભદરપાડા શાળાના નિવૃત્ત શિક્ષક કિશોરભાઈ પટેલ, યુવા સામાજિક આગેવાન નીતિનભાઈ રાઉત, બારીપાડા પંચાયતના સરપંચ સોનુભાઈ ચૌર્યા, ભાપખલ પંચાયતના ઉપસરપંચ ગોપાળભાઈ બંગાળ, પર્વતારોહક ભોવાનભાઈ રાઠોડ, સામાજિક કાર્યકર કોંજુભાઈ ગાવિત તથા બંને સંસ્થાઓના કાર્યકરોની ઉપસ્થિતિએ સમગ્ર કાર્યક્રમને વિશેષ ઊર્જા અને ગૌરવ આપ્યું.
સ્વયંસેવકોએ દૃઢ સ્વરે જણાવ્યું હતું કે, “આ કાર્ય માત્ર અનાજ આપવાનો ઉપક્રમ નથી; આ માનવતાનો મક્કમ સંકલ્પ છે. સમાજના અંતિમ માણસ સુધી સહકારનો હાથ લંબાવવો અને તેમને એકાંતની અંધકારમય ભાવનામાંથી બહાર લાવવો, એ જ અમારો ધ્યેય છે.”
આ અભિયાન ડાંગના પહાડોમાં પ્રગટેલો કરુણાનો જ્વલંત દીપ સમાન સાબિત થયો છે. લાભાર્થી પરિવારોના ચહેરા પર દેખાતી આશા અને આનંદની ઝળહળાટી જ આ પ્રયાસની અખંડ સફળતા છે. ચિખલી પ્રેરણા ગ્રુપ અને સહ્યાદ્રી ડાંગ એસોસિએશને સેવા અને સાહસનો પ્રચંડ સંગમ સર્જી માનવતાનું દ્રઢ અને દિપ્તિમાન ઉદાહરણ પૂરું પાડ્યું છે.
