શ્રોત: ગ્રામીણ ટુડે ન્યુઝ, ૨૪x૭ વેબ પોર્ટલ
વાંસદા ખાતે ભવ્ય હિન્દુ સંમેલન, એકતા અને સંસ્કૃતિનો ઉમદા સંદેશ:
કમલેશ ગાંવિત, વાંસદા : વાંસદા સ્થિત પ્રતાપ હાઈસ્કુલના હિરક સાંસ્કૃતિક હોલમાં વાંસદા મંડળ દ્વારા ભવ્ય હિન્દુ સંમેલન યોજાયું. રાષ્ટ્રીય સ્વયંસેવક સંઘના શતાબ્દી વર્ષ નિમિત્તે સફળ થયેલા “ઘર-ઘર સંપર્ક અભિયાન” પછી સમાજમાં એકતા, સંગઠન અને સાંસ્કૃતિક જાગૃતિને વધુ મજબૂત બનાવવા માટે આ કાર્યક્રમ આયોજિત કરવામાં આવ્યો હતો.
કાર્યક્રમમાં વિવિધ સમાજોના પ્રતિનિધિઓ ઉપરાંત હજારો હિન્દુ ભક્તો ઉત્સાહભેર ઉપસ્થિત રહ્યા. સંમેલનની શરૂઆત દીપ પ્રાગટ્યથી થઈ, જે એકતા, પ્રકાશ અને આશાનું પ્રતિક બની ઊભો રહ્યો.
મુખ્ય વક્તા નવસારી વિભાગના ગૌ સંયોજક શ્રી રાજેશ પટેલે સંબોધન કર્યું અને સંઘના પાંચ તત્વો સામાજિક સમરસતા, કુટુંબ પ્રબોધન, શિષ્ટાચાર, પર્યાવરણ જાગૃતિ, નાગરિક કર્તવ્ય અને સ્વદેશી વિશે વિસ્તૃત માર્ગદર્શન આપ્યું. સાથે જ ગૌસેવા અને ગાયના સંરક્ષણ અંગે સામાજિક જાગૃતિ લાવવા પર ભાર મૂક્યો અને સમાજને સક્રિય રહેવા આહવાન કર્યું.
વાંસદા તાલુકા કેળવણી મંડળના ઉપપ્રમુખ શ્રી રાજેશભાઈ ગાંધીએ હિન્દુત્વના મૂળભૂત મૂલ્યો પર પ્રકાશ પાડતા સમાજને એકસાથે રહેવા અને સાંસ્કૃતિક એકતા મજબૂત કરવા અનુરોધ કર્યો. તેમના ઉદબોધનમાં એકતા, નૈતિકતા અને સમાજની પ્રગતિ માટે દરેકને સક્રિય ભાગીદાર બનવાની વાત રહી.
સાથે જ પ્રજાપિતા બ્રહ્મકુમારી ઈશ્વરીય વિશ્વ વિદ્યાલયના વાંસદા કેન્દ્ર સંયોજક સાધના દીદીએ આશીર્વચન આપતાં નૈતિક મૂલ્યો, આધ્યાત્મિક જાગૃતિ અને રાષ્ટ્રપ્રેમના મહત્વ પર ભાર મૂક્યો અને સમાજને પ્રેરણા આપી કે ભવિષ્યના પેઢીઓને સંસ્કારી અને સંગઠિત બનાવવું આવશ્યક છે.
કાર્યક્રમ દરમિયાન શ્રી ભાવેશ પટેલ (તાલુકા કાર્યવાહ) દ્વારા સ્વાગત પ્રવચન આપવામાં આવ્યું અને આભારવિધિ સંજય મોરે દ્વારા વ્યક્ત કરવામાં આવી. કાર્યક્રમને સફળ બનાવવા માટે વિક્રમ રાજ પુરોહિત, આયુષ ચૌધરી, રોહન પવાર અને રાજુભાઈ સહિતના કાર્યકર્તાઓએ મહત્ત્વપૂર્ણ યોગદાન આપ્યું.
આ ભવ્ય સંમેલન દ્વારા વાંસદા વિસ્તારમાં હિન્દુ સમાજમાં એકતા, સાંસ્કૃતિક મૂલ્યો અને સામાજિક જાગૃતિને નવી ઊર્જા મળી છે. સમગ્ર પ્રસંગે ઉપસ્થિત લોકોનો ઉત્સાહ અને અભિવ્યક્તિ જોઈ શકાતી હતી, જે દર્શાવે છે કે સંગઠિત અને જોડાયેલા સમાજ દ્વારા કોઈપણ પ્રયાસ સફળ બનાવી શકાય છે.
