અમદાવાદ શહેરમાં વિવિધ સ્થળોએ ડિજિટલ લાઇફ સર્ટિફિકેટ (DLC) ઝુંબેશ 3.0 માટે શિબિરો યોજાઈ:

પેન્શન અને પેન્શનર્સ કલ્યાણ વિભાગ, કર્મચારી, જાહેર ફરિયાદ અને પેન્શન મંત્રાલય, ભારત સરકાર દ્વારા, કેન્દ્ર સરકારના પેન્શનરો માટે નવેમ્બર 1 થી 30, 2024 દરમિયાન દેશવ્યાપી ડિજિટલ લાઇફ સર્ટિફિકેટ (DLC) ડ્રાઇવ 3.0નું આયોજન થઈ રહ્યું છે. આ અભિયાનમાં, “સમગ્ર સરકાર” અભિગમ અપનાવીને, બહુવિધ હિસ્સેદારોના સહયોગથી દેશભરના 800 શહેરો/જિલ્લાઓમાં શિબિરોનું આયોજન કરવામાં આવી રહ્યું છે.

કેન્દ્ર સરકારના પેન્શનરો માટે વધુ ‘સુવિધાજનક જીવન’ સુનિશ્ચિત કરવા માટે, નવેમ્બર 2021માં, ડિજિટલ લાઇફ પ્રમાણપત્ર સબમિટ કરવા માટે ફેસ ઓથેન્ટિકેશન ટેક્નોલોજી શરૂ કરવામાં આવી હતી. ફેસ ઓથેન્ટિકેશન ટેક્નોલોજી એવી ટેક્નોલોજી છે જેમાં કોઈપણ એન્ડ્રોઈડ આધારિત સ્માર્ટ ફોન પરથી ડિજિટલ લાઈફ સર્ટિફિકેટ સબમિટ કરી શકાય છે. આ ટેક્નોલોજી સાથે, બાહ્ય બાયોમેટ્રિક ઉપકરણોની જરૂરિયાત ખતમ થઈ ગઈ છે અને જીવન પ્રમાણપત્ર સબમિટ કરવાની પ્રક્રિયા સુલભ અને સરળ બની ગઈ છે.

વર્ષ 2022માં વિભાગ દ્વારા આયોજિત ઝુંબેશમાં, 1.41 કરોડથી વધુ DLC જનરેટ કરવામાં આવ્યા હતા, જેમાંથી કેન્દ્ર સરકારના પેન્શનરોના 42 લાખથી વધુ DLC જનરેટ થયા હતા. નવેમ્બર, 2023માં 100 શહેરોમાં આયોજિત ઝુંબેશ દ્વારા કુલ 1.47 કરોડ DLC જનરેટ કરવામાં આવ્યા હતા, જેમાંથી 45 લાખ કેન્દ્ર સરકારના પેન્શનરો દ્વારા જનરેટ કરવામાં આવ્યા હતા.

આ જ શ્રેણીમાં બેંક ઓફ મહારાષ્ટ્ર દ્વારા અમદાવાદ શહેરમાં નારોલ, સાઉથ બોપલ, ઘાટલોડિયા, નરોડા અને ચાંદખેડા જેવા અનેક સ્થળોએ કેમ્પનું આયોજન કરવામાં આવ્યું હતું. ઈન્ડિયા પોસ્ટ પેમેન્ટ બેંક દ્વારા જીપીઓ લાલ દરવાજા, નવરંગપુરા પોસ્ટ ઓફિસ અને માણેકબાગ પોસ્ટ ઓફિસ. ખાતે પણ આ કેમ્પનું આયોજન કરવામાં આવ્યું હતું. પેન્શન અને પેન્શનર્સ કલ્યાણ વિભાગના અન્ડર સેક્રેટરી શ્રીમતી મધુ મનકોટિયાએ 07.11.2024ના રોજ આ શિબિરોની મુલાકાત લીધી, પેન્શનરોના જીવન પ્રમાણપત્રો બનાવ્યા અને તેમને વિવિધ ડિજિટલ પદ્ધતિઓ જેવી કે ફેસ ઓથેન્ટિકેશન ટેકનોલોજી વગેરે વિશે માહિતી પૂરી પાડી. આમાં તેમને UIDAI, બેંક ઓફ મહારાષ્ટ્ર અને IPPBના અધિકારીઓએ મદદ કરી હતી. આ અભિયાનમાં પેન્શનર્સ વેલફેર એસોસિએશનોએ પણ ભાગ લીધો હતો. આ શિબિરોનો બહોળો પ્રચાર કરવામાં આવ્યો હતો અને આ અભિયાનને સફળ બનાવવા માટે શક્ય તમામ પ્રયાસો કરવામાં આવ્યા હતા.

આ વર્ષે, બેંકો, ઈન્ડિયા પોસ્ટ પેમેન્ટ બેંક, પેન્શનર્સ વેલ્ફેર એસોસિએશન, UIDAI, MeitY, સંરક્ષણ મંત્રાલય, રેલવે મંત્રાલય અને દૂરસંચાર વિભાગના સહયોગથી આયોજિત અભિયાનનો મુખ્ય ઉદ્દેશ્ય એ સુનિશ્ચિત કરવાનો છે કે તમામ પેન્શનરો, ખાસ કરીને વરિષ્ઠ નાગરિકો અને વિકલાંગ પેન્શનરો, તેમના જીવન પ્રમાણપત્ર સરળતાથી સબમિટ કરી શકે છે. દેશભરમાં વિવિધ શહેરોમાં અનેક સ્થળોએ શિબિરોનું આયોજન કરવામાં આવી રહ્યું છે અને બેંક શાખાઓના કર્મચારીઓ પેન્શનધારકોને તેમના સ્માર્ટ ફોનમાંથી DLC જમા કરાવવામાં મદદ કરી રહ્યા છે. ઉપરાંત, ઘર/હોસ્પિટલમાં જઈને જીવન પ્રમાણપત્રો ડિજિટલ રીતે સબમિટ કરવાની વૃદ્ધાવસ્થા/વિકલાંગ/બીમાર પેન્શનરોને સુવિધા પૂરી પાડવા માટે વિશેષ વ્યવસ્થા કરવામાં આવી છે.

ઝુંબેશનો સોશિયલ મીડિયા અને બેનરો દ્વારા પણ પ્રચાર કરવામાં આવી રહ્યો છે અને મહત્તમ સહભાગિતા સુનિશ્ચિત કરવા માટે DLC પોર્ટલ દ્વારા વિભાગ દ્વારા તેનું નિરીક્ષણ કરવામાં આવી રહ્યું છે.